Author: corporate@cahan.az

Qars şəhərində keçirilən Türkiyə-Azərbaycan Regional İqtisadi Forumunda ASK-nın vitse-prezidenti, Naxçıvan Muxtar Respublikası Sahibkarlar Konfederasiyasının sədri və “Cahan Şirkətlər Qrupu”nun təsisçisi Vüqar Abbasovun rəhbərlik etdiyi nümayəndə heyəti və Kiçik və Orta Biznesin İnkişafı Agentliyinin (KOBİA) nümayəndələri iştirak ediblər.

Azərbaycanın Qarsdakı Baş Konsulluğunun dəstəyi, Türkiyənin Odalar və Borsalar Birliyi, Qars Ticarət və Sənaye Palatası və KOBİA-nın təşkilatçılığı ilə baş tutan forumda əsas məqsəd Naxçıvanın biznes və investisiya imkanlarının tanıdılması və sahibkarlar arasında əməkdaşlığın genişləndirilməsi olub.

Tədbirdə KOBİA sədri Orxan Məmmədov, Qars valisi Ziya Polat, Qars Ticarət və Sənaye Palatasının rəhbəri Kadir Bozan, KOSGEB sədr müavini Selim Serkan Ercan və digər rəsmi şəxslər çıxış edərək regional iqtisadi əməkdaşlığın əhəmiyyətini vurğulayıblar.

Forum çərçivəsində Vüqar Abbasov və nümayəndə heyəti Qarsda bir sıra müəssisələrə səfər edib, Türkiyəli iş adamları ilə ikitərəfli görüşlər keçiriblər. KOBİA nümayəndələri isə Qarsın rəhbər şəxsləri ilə görüşərək sərhədyanı ticarət və birgə təşəbbüslər ətrafında fikir mübadiləsi aparıblar.

Qeyd edək ki, forumda “Cahan Şirkətlər Qrupu”na daxil olan bir sıra şirkətlərin rəhbər heyəti də iştirak etmişdir.

Beynəlxalq Əmək Təşkilatının (International Labour Organization) Cenevrədə keçirilən Beynəlxalq Əmək Konfransının 113-cü sessiyası davam edir.

Sessiyada çıxış edən əmək və əhalinin sosial müdafiəsi naziri Anar Əliyev bildirib ki, son illər ölkəmizdə 4 milyon vətəndaşı əhatə edən 5 böyük sosial islahat paketi icra olunub. Minimum əməkhaqqı 3,1 dəfə, minimum pensiya isə 2,9 dəfə artırılıb. Orta aylıq pensiya və əməkhaqqında əhəmiyyətli artım baş verib, müavinət və təqaüdlərə ayrılan vəsaitin həcmi 5 dəfə artırılıb. Konfransda Naxçıvan Sahibkarlar Konfederasiyasının sədri, “Cahan Holding”in təsisçisi Vüqar Abbasov da iştirak edir.

Cahan Şirkətlər Qrupu 30 illik yubileyi və 1 İyun – Ümumdünya Uşaqlar Günü münasibətilə şəhid övladlarına həsr olunmuş xüsusi sosial tədbir keçirib.
Bu təşəbbüs həm gələcəyimiz olan uşaqlara, həm də Vətən uğrunda canını fəda edən qəhrəmanlarımızın əmanətlərinə ehtiramın parlaq təzahürüdür.

Tədbir çərçivəsində uşaqlara çoxsaylı hədiyyələr, eləcə də kiçik kitabxanalarını zənginləşdirmək məqsədilə müxtəlif yaş qruplarına uyğun kitablar təqdim edilib. Bu, həm sevgi dolu bir jest, həm də onların gələcəyinə ünvanlanmış ümid mesajıdır.

Layihə Cahan Şirkətlər Qrupunun sponsorluğu, Azərbaycan Respublikasının Mədəniyyət Nazirliyi, Naxçıvan Dövlət Universiteti və “SEVİNC” İctimai Birliyinin birgə əməkdaşlığı ilə həyata keçirilib.

Bu təşəbbüs bir daha göstərdi ki, dövlət, cəmiyyət və biznes bir araya gəldikdə, uşaqlar üçün atılan hər addım sabaha ümid işığı olur.

Mayın 7-də Dövlət Gömrük Komitəsinin rəhbərliyi ilə “Caspian Energy Club”un üzvləri arasında görüş keçirilib. “Caspian Energy Club”un sədri Telman Əliyev rəhbərlik etdiyi qurumla gömrük orqanları arasındakı əməkdaşlıqdan məmnunluqla bəhs edib, gömrük-biznes dialoqunun gücləndirilməsinin münbit biznes mühitinin formalaşması, xarici ticarət əməliyyatlarının asan və sürətli şəkildə həyata keçirilməsi baxımından mühüm əhəmiyyət daşıdığını vurğulayıb.

Dövlət Gömrük Komitəsinin sədri, gömrük xidməti general-leytenantı Şahin Bağırov gömrük-biznes münasibətlərində bütün mümkün imkanlardan istifadə etməklə xarici ticarət iştirakçıları ilə əməkdaşlığın gücləndirilməsinin əhəmiyyətindən bəhs edib. O da qeyd olunub ki, hazırkı mərhələdə gömrük xidmətində hazırlanan alətlər gömrük dəyərinin müəyyənləşdirilməsinin metodoloji əsaslarla həyata keçirilməsinə, müasir gömrük inzibatçılığı metodlarından istifadə etməklə mal və nəqliyyat vasitələri üzərində gömrük nəzarətinin səmərəli şəkildə təmin olunmasına imkan yaradır.

Görüş çərçivəsində “Caspian Energy Club”un yeni üzvlərinə sertifikatlar təqdim olunub. Qeyd edək ki, “Cahan Şirkətlər Qrupu”nun rəhbər heyəti də tədbirdə iştirak edərək sertifikatla təltif olunub.

Aprelin 30-da Naxçıvan Sarayda “Sahibkarlar Günü”nə və 2025-ci il Azərbaycan Respublikasında “Konstitusiya və Suverenlik İli”nə həsr olunmuş “Konstitusiya və suverenlik – Naxçıvanda sahibkarlığın inkişafı” mövzusunda konfrans keçirilib.

Tədbir, Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyinin dəstəyi, Naxçıvan Muxtar Respublikasının İqtisadiyyat Nazirliyinin və Naxçıvan Muxtar Respublikası Sahibkarlar Konfederasiyasının birgə təşkilatçılığı ilə baş tutub. İştirakçılar konfransdan əvvəl müasir Azərbaycan iqtisadiyyatının qurucusu olan Ümummilli lider Heydər Əliyevin abidəsini ziyarət ediblər.

Naxçıvan Muxtar Respublikasının İqtisadiyyat nazirinin müavini, nazir vəzifələrini müvəqqəti icra edən Abbas İsmayılov tədbiri giriş nitqi ilə açıb. Daha sonra “Sahibkarlar Günü”nə həsr olunmuş film, “İnvest in Nakhchivan” veb səhifəsi, eləcə də “Güzəştli maliyyə dəstəyi” mövzusunda təqdimatlar iştirakçıların diqqətinə çatdırılıb.

Konfransda Naxçıvan Muxtar Respublikası Sahibkarlar Konfederasiyasının İdarə heyətinin sədri, ASK-nın vitse-prezidenti Vüqar Abbasov çıxış edərək Konfederasiyanın fəalliyyəti və görülən işlər barəsində tədbir iştirakçılarını məlumatlandırıb. Qeyd edək ki, konfransda aidiyyəti dövlət qurumlarının rəhbər şəxsləri, sahibkarların ictimai birliklərinin nümayəndələri iştirak ediblər.