Oktyabrın 30-da Azərbaycan Respublikası Əmək və Əhalinin Sosial Müdafiəsi Nazirliyinin tabeliyində olan Dövlət Məşğulluq Agentliyinin təşkilatçılığı ilə ölkəmizdə ilk dəfə Naxçıvanda “Gələcəyin Peşələri” Sammiti keçirilib. 

Azərbaycan Sahibkarlar Konfederasiyasının vitse-prezidenti, Naxçıvan Sahibkarlar Konfederasiyası İdarə Heyətinin sədri və “Cahan Şirkətlər Qrupu” MMC-nin təsisçisi Vüqar Abbasov sammitdə iştirak edib. Vüqar Abbasov çıxış edərək bildirib ki, gələcəyin peşələri özəl sektor üçün sadəcə insan resursu deyil, onlar şirkətlərin innovasiyaya yönəlmiş strategiyasının mərkəzində dayanır.

Oktyabrın 31-də Azərbaycan Respublikasının əmək və əhalinin sosial müdafiəsi naziri Anar Əliyev Naxçıvan Muxtar Respublikasına səfəri çərçivəsində “ENNA” MMC-ni ziyarət edib. “Cahan Şirkətlər Qrupu” MMC-nin təsisçisi Vüqar Abbasov və “ENNA” MMC-nin icraçı direktoru Ruslan Əlimərdanov nazir Anar Əliyevə müəssisə haqqında məlumat veriblər. Qeyd edək ki, Naxçıvan Muxtar Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti və Əməyin Mühafizəsi Mərkəzi “Cahan Şirkətlər Qrupu” MMC-yə məxsus “ENNA” MMC ilə əməkdaşlıq çərçivəsində nümunəvi iş mühitinin yaradılması məqsədilə tədbirlər həyata keçirmişdir.

Müəssisədə əməyin mühafizəsi normaları və qaydaları, qəbul edilmiş dövlət standartlarının tətbiqi, işçilərin əməyin mühafizəsi üzrə təlimatlandırılması, həmçinin istehsalat risklərinin idarə olunması yüksək səviyyədə təşkil olunmuşdur. Müəssisəyə Mərkəz tərəfindən Naxçıvan Muxtar Respublikasında ilk dəfə olaraq “Əməyin mühafizəsi sahəsində nümunəvi müəssisə” statusu verilib.

Müəssisə ilə tanışlıqdan sonra “Cahan Şirkətlər Qrupu”na məxsus Naxçıvan Avtomobil Zavodunun istehsalı olan “Maple X3 Pro” markalı avtomobilə baxış keçirilib.